السياسة مش للكبار بس !!

وزير التربية والتعليم اصدر قرار بمنع الطلاب من الانخراط في اي نشاط سياسي ومن يخالف ذلك تتم معاقبته .
انا عندي سؤال للوزير ولأي حد بيوافق علي قراره دة : اي من المنطقين دول اللي صح ؟
1-اني متعلمش العوم ومعرفش اي حاجة عنه لحد ما أتم ال 18 سنة ولما اتمهم ترميني في بحر واسع وتقولي عومي ولما معرفش او اعوم بطريقة غلط تلومني.
ولا :
2-اني ابتدي اتعلم العوم من وانا صغيرة وأخد وقتي في التعلم واكّون وعيي وخبرتي عشان لما اتم 18 سنة تسيبني في نفس البحر اعرف اعوم بحكمة وبدون تهور او خطأ.
البحر الواسع دة هو الحياة السياسية اللي لما اتم 18 سنة هيكون حقي القانوني اني اشارك فيها بشكل رسمي, تقدر تقولي ازاي هقدر اشارك في الحياة السياسية بشكل رسمي وانا معنديش اي وعي او خبرة سياسية؟ هل ساعتها مش هكون عرضة اكتر اني يتلعب بيا؟ لو فكرت فيها براحة هتلاقي ان من المصلحة العامة اننا نشارك في النشاطات السياسية من واحنا صغيرين , السياسة مش للكبار بس!!
وعايزة اقول لحضرتك كمان ملحوظة صغيرة ؛ انا اعرف طلاب كتير تحت 18 سنة عندهم من الوعي ما يكفي لادارة بلد , ويتفوقوا كثيراً علي سياسيين مخضرمين علي المعاش كمان.