ببساطة ..... العمال هما الحل !

(هذه التدوينة ليوم التدوين عن العمال وفضلهم في الثورة )
     في الاول كدة نعرف الطبقة العاملة ... هي الطبقة اللي بتشمل كل انسان بيعمل مقابل اجر, هي الطبقة اللي بتشيل المجتمع علي ايديها وهما اول طبقة بيقع عليها, هي الطبقة اللي بتتحمل اخطاء المسئولين وهما اللي بيلامو ان الرأسمالية محققتش اهدافها المزعومة اللي هي اصلاً مصالح الرأسماليين !!

يوم 25 يناير لما الناس قررت تنزل الشارع اعتراضا علي حكم الظالم  بعد ما فاض بيهم الكيل ,و كان هتافهم "عيش حرية عدالة اجتماعية"  ... ميدان التحرير كان له اهمية كبري في الثورة محدش هينكر دة , لكن لو العمال كانوا بيشتغلوا كان ميدان التحرير هيسقط مبارك ؟ من وجهة نظري , كان مبارك هيكتفي انه يرميلنا شوية فتات اصلاحات وكان هيتحول ميدان التحرير لهايد بارك . 

لكن الضغط علي مبارك كان من كل ناحية والضغط الاكبر اللي يسقط اطغي طاغية كان من الطبقة العاملة , الاضرابات العمالية اللي الناس بتسميها "فئوية" *وانا ضد هذا المصطلح بشدة* وجاحد اللي هينكر دورهم , وجاحد اللي بيهاجمهم دلوقتي , العمال هما الامل !!

العمال اللي كل يوم بينزلوا يقفوا في الشمس ويتنبح صوتهم وبيخاطروا بشغلهم وبيتعرضوا لعقوبات عشان مطالب انت شايفها انانية , بيسطروا بايديهم التاريخ والمستقبل , بيكتبوا بايديهم نهاية كل حكم ظالم .... مش دة حلمنا ؟ نهاية كل حكم ظالم ؟ وايه اظلم من نظام سرق ثورتنا ؟ ايه اظلم من نظام بيحبس ثوارنا ؟ ايه اظلم من نظام بيقتل فينا واحد ورا التاني ؟ ايه اظلم من العسكر ؟ 

لو ركزتوا وربطتوا بين كل الاحداث اللي بتحصل هتعرفوا كويس اد ايه العسكر خايف من العمال ... قانون تجريم الاضرابات , الحملة الاعلامية القذرة الموسعة ضد الاضرابات , حبس بعض العمال المضربين وتوقيع عقوبات شديدة عليهم , ودة مش جاي من فراغ , دة جاي من رعب كامن جوه قلوب الجالسين علي كرسي السلطة , اللي العمال بيكسروا في رجليه ببطئ !!

نرجع نقول ببساطة شديدة العمال هما الحل , ولو لم تساندوهم يبقي هتحفروا اقباركم بايديكم زي مالعسكر بيحفر قبره دلوقتي وهو مش دريان , ساندوا مظلوم عشان انتم مظلومين , ساندوا مظلوم بيساندكم وانتم وهو مش واخدين بالكم بس بكرة هتتأكدوا , ساندوا مظلوم يساندكم الله :) 

العمال هما الحل ... العمال هما الحل ... العمال هما الحل ... العمال هما الحل !